Had to run for my life from angry spouse

From mi a grow mi a hear story about man a get catch a woman yard and always swear mi wouldn't make dat reach mi cuz nuh woman nuh suh great; but I was wrong.

Mi say mi and a girl a link and we always back and forth a each other yard. She have a babyfather but mi never meet him because she say she and him seven years now.

One night mi go to her house and mi in deh a gwan relax. Right as we deh deh a carry on, somebody knock the door and mi hear a man a bawl out fi she open up. Di two a wi go silent.

Mi take time and signal her a ask 'a who dat?'. She tell mi say is her babyfather. So mi ask why him at the house and she say 'long story'.

STAR from mi hear she say so, mi heart reach a mi mouth and mi start wonder how mi a go escape cuz a one door. Di man bawl out ignorant and say 'Open di bl#$%aat door because mi hear unnuh'. Before yuh know it di woman open di door and a try take way herself. Di man look pon mi and say 'bredda a who you?' Mi couldn't answer di way mi frighten.

Mi just make one dive tru di window. When mi get up, mi just start run and is a good ting is the neighbouring community mi live inna cuz a just mi underpants mi have on. When mi a run pass mi hear a man a tell him brethren say it look like mi smoke too much weed and it mad mi make mi a run and sweat suh. But mi never stop to explain. Mi reach and see mi brethren dem and dem give mi some water fi drink and mi tell dem wah gwan and dem laugh mi to scorn. Mi never mind because mi just glad mi safe.

Likkle after mi see mi phone a ring and a di liad woman come up. So mi answer ready to cuss but a never she on di line. It was her likkle son ask if mi know whe him madda pressure pill deh.