Woman does threesome to keep sister's secret

Bless up, all TamFam massive and Ragashanti Live listeners. Straight blessings.

On to di drama:

Sista Love

Two sista live up ya inna Uncle Sam country. Dem live inna two different states. One is a nurse, and one work at a place that takes care of the elderly. Di two a dem resemble to di point weh people tink dem a twin, but dem is not twin, dem jus fayva bad.

Di sista dat is a nurse works at a hospital inna fi har state. She married, but she a bun har husband wid a senior manager at di hospital. Of course she and di bunaman manager haffi hol dung dem ting and don't mek nobody know wah dem a gwaan wid.

One time now di nursing home sista did a go through hell pon fi har ends, based pon di fact say she nuh legal inna di country. She talk to har sista bout it, and dem work out a ting weh she can fahwud up a di sista state fi do a business marriage fi she work pon har ting. Based pon how di business marriage did haffi juggle, di married sista couldn't tell anybody say har sista inna di place fi do di business wedding.

Afta di nursing home sista fahwud, she did haffi falla har sista go work, and stay inna har car while har sista a work, cause dat was how it did haffi run fi meet di business wedding man right afta di hospital sista done work.

While di nursing home sista a wait outside inna di parking lot, di hospital sista bunnaman fahwud and see har out deh one-away a reason wid di bunnaman way dung inna one dark cawna. Him now go tink say a him bunnawoman, di nurse sista, dung deh wid a man. Later him ask har if at any point she did inna di parking lot wid a man? She deny it to di ground, which of course was true, cause it was har sista. Di dutty, crasses, joncrow afterbirth bunnaman get mad and vex say a lie she a tell and eventually tell har say she haffi do a threesome wid him fren or else him a go get har fired and probably all mek har husband know say she been a bun him.

Fi wateva reason di nurse sista insist say she cyaan explain di truth to har bunnaman bout har sista. And because a dat, she agree fi mek di bunnaman and him fren rinse har out wid di threesome. She tell har sista say she nuh fi worry cause she already quietly a mek plans fi leave di hospital weh she work. And yes, di sista did get through wid har ting and straight ya now.

Pon a level yuh can say di nurse sista mek a huge sacrifice fi har sista, but yuh still haffi wonda if there wasn't another way fi she work har way outa di bunnaman misunderstanding. Di bunnaman a dutty man tho.

Aye sah! Life...

Awright, leggomentz again. Send mi unuh drama dem at ragashanti@tambourineradio.com. See unuh next Thursday same place ya so inna di STAR. Bless up.

Road!!