Threesome goes belly up

Dis bredda an him woman love fi mix up di ting wen dem a du-soh du-soh. Well, actually, a di man love di freakiniss, an di woman always a go along wid weh him want jus fi please him.

One a di ting weh di man love a threesome. Of course, him ongle love it wid anneda woman. Di ting is dat most a di time dem run a 'threes' is usually di case weh him get him woman fi get di oda woman. Yeah, a fi him ting dat.

A regula him see him woman fren dem an quietly tell har fi line up di fren dem fi a 'threes'. Or him wi mek him woman fren a woman an work har until she agree fi participate inna a 'threes'.

Soh anyway, one time him get him woman fi convince one a har hot fren fi run a 'threes' wid dem, an she did. Dem actually run di ting several times an it always shot. However, after a while him an di fren staat duggu-duggu behind him woman back. Yeah, him woman fren staat run di juju one-away.

It reach di point weh him breed him woman fren! Yeah. But dem hol it dung an tell him woman say a him cousin breed di fren. Him woman staat gi har fren bare support tru di pregnancy an de deh fi har straight tru - wid di bredda cousin a play di part an a gwaan like a him a di baby fada.

Anyways, wen di fren did a breed she staat presha di man fi lef him woman, har fren, caa she did a say di ting get serious now wid pickney involve, soh him fi jus seal up di ting wid she (di fren) alone.

Cut long story short, di man eventually lef him woman, but him still neva tell har say all dat time him did deh wid, an breed har fren weh him did mek she bring fi do di threesome dem.

Soh long afta baby baan an bay tings, one day di ex-woman a juggle tru a ends, an low an behold she buck up pon har ex-man wid har fren an dem baby! As she look pon di baby she see say di pickney a di dead stamp a har ex-man!

She immediately maths out di ting an realize say di pickney was not fi har ex-man cousin, but indeed was fi di ex-man. A piece a stress tek har same time. Gyal head get dizzy an she weak out. Den buff!!! - she kinova an tumble dung a grung!

Of course, dem haffi get medical intervention fi har an help come back to.

She eventually recover an move on wid har life, but needless to say dat is one experience dat will forever have an impact pon everyting she do inna har life.

Awright, leggomentz again. Link mi wid unuh drama dem at ragashanti@tambourineradio.com See unuh next Thursday same place ya so. Bless.

Road!