Cereal inna syrup mash up friendship

Concrete large up to all Tamfammers and Ragashanti Live listeners. Straight blessings as usual.

Sometimes even di simplest likkle tings can turn off smaddy. It might not be a big deal to anybody else, but some people jus cyaan manij certain tings weh some people do different.

Dis woman always drink har cereal inna syrup or juice. Yup ... syrup or juice. She love buy di cereal dem weh name Honey Bunches of Oats, or Golden Grams, and neva yet eat dem wid milk always juice or syrup. And she use any juice pineapple, cranberry, grape, orange, apple, etc. With regards to the syrup, she go dung a Flatbush, Brooklyn, and buy di Jamaican syrup. She mix di syrup inna wata and then throw in di cereal after.

Di problem now is dat har roommate think she nasty fi a do dat wid cereal. Di roommate cyaan stan it. But hear wah, everybody di roommate tell bout it say dem wouldn't call it nasty, dem woulda more say it strange but not nasty. Di roommate continue fi disagree tho. She convince say it nasty.

Di roommate hate it so much dat it turn har off from har fren. She nuh into har. She nuh waan hang out wid har. She stop go places wid har. And is ongle when it absolutely necessary dat she talk to har.

Mountain out of a molehill

Di roommate fren dem keep on a tell har dat a she a di problem cause she a mek a mountain out of a molehill, dat she keep on a mek a big deal outta sup'm dat is foolishness. But all di roommate try fi undastand, she jus cannot bring har self fi see past di cereal inna juice and syrup.

Di cereal woman tell har madda how har roommate a behave and di madda arrange a meeting wid di two a dem. Inna di meeting di roommate ask di cereal woman if she can just stop di behaviour? But di cereal woman say she nah stop cause she really don't see what's the big deal. Pon top a dat, di cereal woman say she don't eat meat, but di roommate eat meat, and she has neva made dat bother har to di point where it a affect dem frenship and a issue ultimatum fi di roommate stop eat meat. She say she not eating meat, and di roommate eating meat, is a much bigger issue dan har likkle cereal inna juice and syrup yet she nuh mek it bada har, So based pon dat, di roommate shoulda more than able fi undastand and leggo di issue.

Di roommate responded dat she still cyaan get past di issue.

Dem still live together inna di apartment a Brooklyn ... not sure how long that a go continue though.

And jus like dat, one likkle piece a foolishness tun inna sitten big weh a threaten fi destroy an otherwise great friendship.

Life.

A it dat. Leggomentz again. Send mi unuh drama dem at ragashanti@tambourineradio.com. See unuh next Thursday same place ya so. Bless up unuh self.

Road!