Lesbians brandish dildo at male scammer

Yoggo yoggo yow yow!! Waa gwaan TamFam? Hope unu good, enoh. Mi deh ya inna di runnings same way a give tanks fi di whole heap a blessings weh jus a flood mi soh. Life is rahtid good!! A dat mi say.

Bless up all a Ragashanti Live and Tambourine Radio listeners. Big up unuself propa. Awright, on to di mixup dem now.

Soh yuh have dese women and girls a Jamaica weh jus siddung every day an hustle pon dem phone. One a di commonest phone hustle is to call random numbers a farrin an wen smaddy ansa, dem use sweet voice an gwaan like dem accidentally dial di wrong numba.

Den if a smaddy weh soun ketchish, dem just neatly staat up a convo wid di person. Afta dat di link can lead to oda phone calls wid di farina an all can lead to phone sex, too. But of course di farina haffi a sen money to Jamaica.

Well mi up ya a Obama Lan an a hear bout dis bwoy a Jamaica weh a phone hustla. Him run him ting an buck up pon a farrina woman pon di phone. Him neatly staat wap har up wid bare lyrics till dem claim seh dem deh. Di bwoy full up har head wid a bag a foolishniss an tun har inna kunnumunnu mek she swear seh she in love.

Di woman goh Jamaica an di bwoy woulda kill har wid some sample grind. Dude jump up inna har belly non-stop fi di four days she did deh a Kingston. Mi hear seh wen him fling him mout dung deh suh pon har an service har wid some name-brand swipe, di woman seh all wen him done, har juju did still a tremble! It did jus a tremble soh lakka seh it have fits.

BRING HIM A FARRIN

Anyway, di bwoy convince har fi bring him come a farrin. Cut long story short, she use govament links an get visa fi him an buy him ticket fi fahwud a New York.

Awright, afta ticket buy an everyting set fi missa man drap inna di place, him goh a one dance a Jamaica wid him real woman. One piece a flossing an bare tings wid him catty. Di most suck out tongue an X-rated dancing an a whole heap a supm. Him neva stop big up him woman inna video light an a talk how nuh gyal can come between him an har.

PAATY FLEX

Anyways, all a di paaty flex get post pon Facebook. Smaddy up ya weh know di farrina weh him a con see di video an show har. She den staat wid one whole heap a cow bawling wen she see di video, den she get bex an go tell har bad-gyal cousin.

Har cousin is a lesbian who run off har owna ends, sell drugs, have up har machine dem, an a whole heap a supm. Real in-di-street gyal. Di cousin tell di woman weh get con seh she nuh fi worry harself, an dat she an har crew we goh pick him up fram di airport.

Wen missa man come outa di airport, is a propa hot gyal dat move to him an tell him di woman weh him fi meet (di one weh him a con) sen har fi pick him up. Him jus say ok an falla har to di parking lot to a waiting van. As soon as him step inna di van ... SCLOW!!!! Is a rahtid bax dat reach him fram a heavy han!! Den bare kick an tump all ova him. Mi hear seh dem beat out crasses outa him. An a tree big tick woman did a beat him, enoh.

Den afta the beaten, a some big gun dat him a look up inna. Den dem tie him up. Mi hear seh dem do him bad bad, buss him up an bare supm.

Wen dem done wid him, dem clean him up an tell him seh since him come out a di airport dem mek smaddy change him ticket an dem a sen him back immediately pon a nex flight.

Dem carry him back a arrivals an tell him seh if him report anyting a bare tings a goh reach him an him family, an dat if him eva try come back outa di airport, a some bigga dildo a reach him. Dem seh wen dem let him goh him was soh dazed, scared, an confused dat him jus run goh eena di airport like frighten puss.

Wen di cousin goh back an tell di girl weh get con weh dem do, di girl staat bawl. While she did basically want har bad-gyal cousin fi rough him up, she neva waan dem rape him dem way deh. She bawl! She eventually call him a Jamaica an apologise. But di dawg, obviously feelin' betta an more secure a Jamaica, mek she know if him eva buck har a Jamaica, him an him crew a goh done har.

A bare drama a gwaan out deh wid di scamming ting. A bag a supm. If we did fi hear all a scamming mixup dem we coulda probably write a hundred books.

Awright, leggomentz now.

Sen mi unu drama dem at ragashanti@ragashanti.com.

See unu nex Thursday same place yah soh inna di STAR. Bless up.

Road!