Woman leaves boyfriend for planning threesome

Yoggo, yoggo, yow! Wah gwaan TamFam? Hope unuh belly full and naasy nayga nah get di betta a unuh. Straight blessings to all Ragashanti Live listeners ova www.tambourineradio.com. Concrete big up, straight.

On to di drama.

Wrong 3s

So dis bredda ya have him woman, but a gwaan wid a bag a tings pon di side. Him deliberately leave him phone open roun' har cause as far as him concerned, him always mek sure nutten nuh in deh fi she see and find him out. Him mek sure seh him delete everything before him reach home and set him ting so none a him bunna woman dem sen him anything when him deh home.

Anyways, him woman suspect seh him a gwaan wid tings and regularly tek a prips inna him phone, but she neva yet able fi find anything in deh weh gi him weh.

One day though sup'm tell har seh fi check inna him email trash. When she go in deh, she buck up pon a bonanza a information weh confirm seh him a bun har. Yeah, di man been a delete di bunning email dem, but did a lef dem inna di trash! Right away when him woman find di sup'm dem she start forward and text dem to har phone. She den get curious when she see text between him and one a di woman dem a plan a threesome. She jus mek sure she specially forward all a da info deh. But in doing so she realise seh di threesome weh a plan a wid she and another man. Di planning all involve she a sen him a pic a di other man instrument, wid har man a seh him cool wid di size.

However, di plan was not fi him and di other man do anything together inna di threesome. Rather, di deal was dat she did waan fulfil a fantasy fi sort out di two man dem at di same time. And in agreeing to di arrangement him did jus waan mek sure seh di man instrument neva well bigga than fi him own. Him neva waan di man wheel out a helleva lightpost and embarrass him. Dwl.

Nonetheless, even though har man neva did a go inna any gay thing wid di man, she did still shock and turned off seh him did a go inna threesome wid him and a naked man round each other. She seh she coulda probably get past di fact seh him did a bun har wid other woman, but she cyaan get ova seh him agree fi be naked round a next naked man even though him and di man neva did a go do nutten.

She lef him.

Yups! Pack har things, move out, and nuh have no more dealings wid him.

Jus like dat.

All right, a deh so it deh. Jugglementz again. Sen mi unuh mixup dem at ragashanti@tambourineradio.com Bless up unuh self till next week when wi link again same place yah so.

Road.